歐國外J組尾輪賽事，葡萄牙主場迎戰冰島。葡萄牙雖然已經提早出線，但佢哋歐國外9連勝未見想收韁，加上主場出擊例必火力全開，遇上無緣直接晉級嘅冰島，3.5球入球大更值博。（周一凌晨3時45分開賽）
C朗乘機「刷數據」
J組榜首嘅葡萄牙，查實喺上月歐國外已經落實出線，不過佢哋仍未有收韁迹象，日前作客以2比0輕取列支敦士登，今屆歐國外豪取9連勝，只差1場勝仗便「十全十美」。隊長C朗呢場都有進帳，累積10個士哥，未計周日賽果，依家拍住盧卡古並列今屆歐國外射手榜榜首之餘，呢位老將為葡軍上陣204場，共入128球，鬥心未減，相信佢唔會錯過今場「刷數據」機會，並且為球隊爭取史上首次歐國外全勝紀錄。
冰島上輪力戰之下，反輸畀斯洛伐克2比4，肯定無緣前2直接出線席位，對冰島嚟講今場係例行公事，只係待歐國外打完後，睇吓有冇得踢附加賽，唔慌有戰意。睇番葡萄牙主場出擊例搏，近4次主場有3次開4球或以上，包括狂數盧森堡9比0，今場實多波入，3.5球大盤有計。
