日職第2輪賽事，橫濱水手主場迎戰福岡黃蜂，水手係日職爭標勁旅，近5年曾兩度奪冠，去年僅屈居神戶勝利船之下得亞軍，實力高黃蜂一籌，加上雙方近6次交鋒水手取得5勝1負，對賽有明顯優勢，主勝值得睇好。
（無綫my TV SUPER周五晚6時直播）
上仗險勝唔敢再輕敵
首輪賽事，水手作客2比1反勝東京綠茵，佢哋甫開賽7分鐘即落後，戰至完場前先靠對方烏龍球追和，再於補時憑松原健攻入絕殺球，贏波過程驚險，但亦反映球隊作戰經驗豐富，相信今場會打醒十二分精神應戰，唔會再輕敵。
至於福岡黃蜂係日職中游球隊，上季排第7，佢哋首輪主場出擊，只能同北海道札幌岡薩多踢成0比0，佢哋踢法被動，即使佔主場之利，控球率亦只得35%，今場作客水手勢必捱打，輸波係意料中事，一於捧主W。
