周日(14日)：西班牙 Vs 英格蘭 (加東時間下午3:00)
頭尾足足31日嘅2024歐國盃，話咁快就到咗冠軍戰，由三屆盟主西班牙火併連續第二次殺入決賽嘅英格蘭。
講聲勢，英格蘭先贏一仗，呢幾日關於佢哋嘅消息比西班牙多何止一倍，例如捧盃可以得折合約1億港元嘅獎金；英格蘭飛柏林機票短缺，即使私人飛機機票漲價至折合約18萬港元都一票難求；比寧咸肩傷食止痛藥頂埋決賽；賴斯承諾捧盃飲人生第一杯啤酒；英隊決賽輸波修夫基都獲續約??場內場外都咁精彩，好睇過戲。
講番明日場冠軍戰，西班牙嘅戰績同氣勢真係一時無兩，殺入決賽6場波全部贏曬，連和波都無，如果決賽都贏埋就正宗長勝軍，實至名歸嘅歐洲王者。
英格蘭當然唔似西班牙咁場場贏波，但其實佢哋6場都無輸過。換言之，要贏佢哋一啲都唔容易。
根據最新軍情，雙方出戰冠軍戰嘅人腳大致落實，但各有一個位置仍懸而未決，西班牙中堅人選會係停賽期滿的拿洛文特和拿祖費南迪斯之間二選一。至於英格蘭，到底左翼衞係新近傷癒嘅勞基梳爾，抑或一直表現不過不失嘅捷比亞，修夫基仍然未有定案。
今場比賽關鍵看點，星爺認為只得一個，就係英格蘭後防如何抵擋火力十足嘅西班牙攻勢，尤其係西班牙左路有速度奇高的尼高威廉斯，右閘基爾獲加狀態不俗，但亦未有十足把握可以箝制到呢位當打嘅快翼。就算左邊可以擺平，來自新人王耶馬右路可傳可射嘅攻勢，英軍右路守將，不論係勞基梳爾抑或捷比亞，睇嚟都好頭痕。矛盾大戰，一觸即發！
星爺咁睇，西班牙晉級路上的對手卡士強勁，上屆冠軍意大利、東道主德國、世界排名第二的法國，全部都稱臣佢哋腳下，證明佢哋係靠表現同實力入決賽，絕唔係僥倖。所以，雖然星爺講過，大部分捧盃球隊，奪標路上多少都有啲阻滯，好少話全程順風順水，但呢支西班牙隊確係太強勁，近乎無堅不摧，完全睇唔到佢哋捧唔到盃嘅有力證據，所以今次星爺都要一改平日諗法，亦同AI拍檔唱反調，一於捧西班牙九十分鐘贏波捧盃。
雙方可能正選陣容
西班牙：
門將：烏尼西蒙
後衛：丹尼爾卡華積、拿洛文特、拿樸迪、古古列拿
中場：法比安雷斯、洛迪、丹尼奧莫
前鋒：耶馬、莫拉達、尼高威廉斯
英格蘭：
門將：比克福特
後衛：基爾獲加、史東斯、馬克古希
中場：布卡約沙卡、高比馬恩奴、迪格蘭賴斯、勞基梳爾
前鋒：比寧咸、科頓、哈利卡尼
AI預測：
西班牙 Vs 英格蘭 (下午3:00)
預測賽果：英格蘭勝
半場比分：西班牙 0-1 英格蘭
全場比分：西班牙 1-2 英格蘭
總入球數：3球
