歐聯C組賽事，已提前鎖定出線權嘅皇家馬德里，將會喺主場迎戰意甲勁旅拿玻里。皇馬目前4戰全勝，今仗只要和波就肯定首名晉級，考慮到皇馬目前傷兵眾多，教練安察洛堤或會收起部分主力，令拿玻里有機可乘，隨時被殺個措手不及。（Now 643周四凌晨4時直播）
艦隊傷兵多留力踢西甲
皇馬有雲尼斯奧斯祖利亞、卡馬雲加、曹亞文尼等傷兵，王牌祖迪比寧咸嘅膊頭傷患亦未100%康復，預計安察洛堤會「錫住用」，保留戰力應付西甲賽事，有可能會先任後備，有需要先至落場救亡。
至於拿玻里4戰7分排次席，今仗贏波即可出線，戰意鮮明，而且喺新帥馬沙利執教下，上仗作客擊敗阿特蘭大，進攻效率提升。拿玻里有域陀奧森漢、基華拉斯基利亞等頂級前鋒壓陣，搶攻能力極強，今屆4場分組賽全部率先入波，今仗一於博第一隊入球[客]。
